جديد السفة بالدجاج و التفاية


جديد السفة بالدجاج و التفاية


الكل كيعرف السفة بالدجاج اما  انا بغيت نجيب ليكم شي حاجة جديدة لي هي اني زدت التفاية على السفة
نبدا بادن الله

طريقة التحضير :
اولا تنرطبو شوية ديال الزبيب في الماء..
او من بعد  نصلقو شوية لوز ونفسخوه ونقليوه نهرمشوه ولكن نخليو منو شي شوية للزواق.

كنديرو الدجاج في الكوكوت وعليه الزيت( شوية رومية وشوية بلدية) بصلة مشلظة ملح بزار خرقوم سكينجبير شوية سمن درس توم محكوك الربيع ليبغيتوه مربوط او مفروم نترك الكل يتشحر شوية من بعد نروي غير القياس لي يطيب الدجاج وباش تكون المريقة خاترة وواقفة من بعد نسدو على الدجاج يطيب

منين ينضج الدجاج نحيدوه من الكوكوت ونخليوه يتسقطر تم نفرتتوه بحال الى باغيين نديرو بسطيلة..
ثم ناخدو بصلة نقطعوها على شكل دوائر ونديروها في كاسرونة ونضيفو ليها الزبيب بعد ما صفيناه من الماء + ملعقة من السمن + الملح + سكين الجبير + لبزار + عود ديال القرفة. او كنخظو المرقة من الكوكوت ونضيفوها لتفايا ديالنا كنخليو البصل حتايطيب عاد نضيفو ليه السكر ونتركه يتعسل ومنين نقربو نطفيو ليه نرميو راس ملعقة صغيرة  من الزبدة..
ملاحظة :


دابا ها التفاية واجدة والدجاج مفرتت
نمرو للسفة الشعرية ندهنها بالزيت ونردوها تفور مزيان
من بعد ما فارت تقريبا شي نصف ساعة نخويو الكسكاس في القصرية ونسكب عليها الماء الطايب نحركها مزيان
ومنين تتشرب شوية الما الطايب وتكون دفات شوية نحيدو ليها الفائض من الماء ودلك بتصفيتها فشي شبكة متلا او في الكسكاس نفسه
تم نرجعها تفور الفورة التانية
ونفس العملية منين تفور نضعها في القصرية ونسكب عليها الماء الطايب غير القياس باش تا الشعرية تشربو
والى بقا شي فائض نصفيوها وتكون دافية منخليوهاش تتبرد ونعمل لها شوية ملح وشي 2 معالق كبار عامرين زبدة والجديد كدلك في هاد السفة اننا كنرشو عليها واحد معلقة كبيرة زهر وسنيدة القياس لي غيحليها تم نحلوها بايدينا
تم نرجعوها تفور مزيان للمرة التالتة والاخيرة نتمنى نكون شرحت مزيان وشرحي يفهموه حتى الاخوات المبتدئات

منين نبغيو نقدموها كنقلبو الشعرية في القصرية و
نديرو ليها شوية زبدة في وسط الشعرية باش تدوب مع السخونية ونغطيوها بشي منديل حياتي من 3 الى 5  دقائق و نحلوها بايدينا مع الزبدة لي كنا درنا فيها او من بعد
ناخدو طبسيل كبير نضع فيه فرشة ديال السفة  تم الدجاج المفرتت والتفاية مخلطين ونرشو باللوزالمهرمش
ونغطي الكل بالشعرية ونزوقها بالسكر
والقرفة واللوز المهرمش وكدلك اللوز الصحيح وبالصحة والراحة  .